20.10.2011

Се бара изведувач за Плоштадот „Скендербег“ во Скопје

Општина Чаир вчера распиша меѓународен тендер за изградба на првата фаза на Плоштадот „Скендербег“. Изведувачот би требало да се знае во втората половина на следниот месец, а од Општината се надеваат дека до крајот на годината ќе започнат градежни активности на терен. Автори на идејното решение се архитектите од „Архинг Груп“

Плоштадот „Скендербег“ ќе се реализира во три фази. Првата фаза го опфаќа просторот пред стоковната куќа „Илинден“, а со третата фаза плоштадот ќе се прошири и на територијата на општината Центар, се до објектот на Македонската филхармонија [»мапа]. За таа цел ќе биде премостен булеварот Гоце Делчев на потегот од крстосницата со улицата Стив Наумов до стоковната куќа „Мост“. Ваквата проширена верзија на плоштадот, за која Општина Центар се согласи летово, ќе се простира на вкупно 28.674 метри квадратни, наместо 12.865 метри квадратни доколку проектот се реализираше само на територијата на Чаир. Идејното решение содржи и подземна гаража на просторот околу стоковната куќа „Илинден“. Проектот ја има подршката на Владата на Република Македонија, која за негова реализација досега обезбеди околу 650.000 евра.

[https://build.com.mk/se-bara-izveduvach-za-ploshtadot-skend/]

/////////////////////////////////////////////////////////

17.01.2012

Камен темелник за Плоштадот „Скендербег“

Денес беше формално означен почетокот на изградбата на Плоштадот „Скендербег“ во Скопје, проект тежок 10 милиони евра. Градежните работи ќе се одвиваат во три фази. Во првата фаза која ќе чини 2,5 милиони евра е предвидено поплочување на просторот пред стоковната куќа „Илинден“, како и покривање со плато на комплексот дуќани на улица Казанџиска. Оваа фаза би требало да заврши во рок од седум до осум месеци.

Целиот проект треба да финишира до 2014 година, до кога плоштадот ќе се прошири и на територијата на општината Центар, се до објектот на Македонската филхармонија [»мапа]. За таа цел ќе биде премостен булеварот Гоце Делчев на потегот од крстосницата со улицата Стив Наумов до стоковната куќа „Мост“. Ваквата проширена верзија на плоштадот, за која Општина Центар се согласи минатото лето, ќе се простира на вкупно 28.674 метри квадратни, наместо 12.865 метри квадратни доколку проектот се реализираше само на територијата на Чаир.

Автори на идејното решение се архитектите од „Архинг Груп“, изведувач е скопската подружница на австриската компанија „Алпине“ (Alpine Bau GmbH), а надзорот го врши „Веинг“. Проектот го финансира Владата на Република Македонија и Општина Чаир.

[https://build.com.mk/kamen-temelnik-za-ploshtadot-skender/]

///////////////////////////////////////////

Скопскиот плоштад „Скендербег“ ќе ги поврзе општините Чаир и Центар, а се гради , во неколку фази, почнувајќи од јужниот приод на Старата скопска чаршија.

Kамен темелникот за изградба на плоштадот беше поставен на 17 јануари 2012 година. Првата фаза заврши со неколкумесечно задоцнување поради банкротот на австриската фирма „Алпине бау“ во пролетта 2013 година.

Предвидено е плоштадот да се протега на површина од 28.674 квадратни метри, сѐ до објектот на Македонската филхармонија. За таа цел се врши премостувањето на булеварот „Гоце Делчев“. Задачата ѝ е доделена на фирмата „Бауер БГ“.

Истовремено, општина Чаир распиша Конкурс за избор на идејно решение за изработка на мозаици за надземен пешачки премин. Избрано е решението на Јосиф и Лиљана Дробонику, Тома Томаи Џамо и Невзат Бејтули.

По завршувањето на втората фаза, ќе биде распишан тендер за изведба на третата фаза, со која е предвиден подземен паркинг на две нивоа со капацитет од 400 возила на местото на постојниот паркинг кај стоковната куќа „Илинден“.

Идејното решение за изградба на плоштадот „Скендербег“ го изработи бирото „Архи Груп“. Автори на идејното решение се архитектите Бетим Зеќири, Бекир Адеми и Бесиан Мехмети.

Проектот го финансираат Владата на Република Македонија и општина Чаир.

[https://skopje2014.prizma.mk/mk/Ploshtad-Skenderbeg]

/////////////////////////////////////////////////////////

29.12.2013

Плоштадот „Скендербег“ ќе биде завршен во 2014 година

Иако доцнат изведбените работи на проектот, плоштадот „Скендербег“ ќе биде завршен на време. Од Општина Чаир ветуваат дека преостанатите две фази од изградбата на овој јавен простор во центарот на Скопје ќе бидат завршени во текот на 2014 година. Како што беше објавено и на започнувањето на проектот, наредната година ќе се работи на најсложениот дел – втората фаза, која опфаќа премостување на булеварот „Гоце Делчев“ до објектот на Македонската опера и балет. На тој начин, ќе се оформи целината на ова урбано јадро, кое треба да се поврзе со плоштадот „Филип Втори“. Причина за доцнењето во реализацијата на проектот е долгата процедура за добивање на документите, кои не се докомплетирани. Од Општината наведуваат дека изградбата на плоштадот ќе продолжи напролет.

Остварувањето на проектот за плоштадот „Скендербег“ стартуваше во јануари 2012 година, а што најголем дел од изведбените активности финишираа во првата половина на 2013 година. Како изведувач на зафатот беше избрана австриската градежна компанија „Алпине“, која банкротираше во текот на јуни година. Овие околности влијаеја врз завршните работи на првата етапа од проектот, кој според одговорните од Општина Чаир сега комплетирани.

Финансиската конструкција на овој проект изнесува околу 10 милиони евра, средства што се обезбедени од владиниот и локалниот буџет. Идниот плоштад ќе се простира на површина од 28.674 метри квадратни, пешачка зона што ќе ги спојува општините Центар и Чаир. Во рамките на проектот е предвиден и подземен паркинг на две нивоа на местото на постоечкиот паркинг кај споменикот „Скендербег“.

[https://build.com.mk/ploshtadot-skenderbeg-ke-bide-zavr/]

//////////////////////////////////////////////////////////

09.11.2014

Втората фаза од изградбата на плоштадот „Скендербег“ во Скопје ќе голтне 10 милиони евра (ДОПОЛНЕТО)

Фирмата „Бауер БГ“ ќе го изведе премостувањето на булеварот Гоце Делчев, со кое плоштадот „Скендербег“ ќе се прошири и на територијата на општина Центар [»мапа]. Градежните работи треба да почнат во наредните десетина дена и да се завршат во рок од една година, а според информациите што ги пренесе дневниот весник „Дневник“, „Бауер БГ“ за своите услуги ќе наплати околу 10 милиони евра. За време на реализацијата на проектот ќе функционира посебен сообраќаен режим.

Основниот проект за оваа фаза од изградбата на плоштадот „Скендербег“ го изработи Друштвото за градежништво и услуги „Урбан Стил Инженеринг“, за што Општина Чаир веќе издвои околу 440 илјади евра. Проектот предвидува изградба на мост преку булеварот Гоце Делчев на потегот од крстосницата со улицата Стив Наумов до стоковната куќа „Мост“, врз кој ќе се наоѓа платото на плоштадот (со што ќе бидат покриени околу 150 метри од булеварот). Ваквата проширена верзија на плоштадот, за која Општина Центар се согласи во 2011 година, ќе се простира на вкупно 28.674 метри квадратни, наместо 12.865 метри квадратни доколку проектот се реализираше само на територијата на Чаир.

По завршувањето на втората фаза, ќе биде распишан тендер за изведба на третата фаза, со која е предвиден подземен паркинг на две нивоа со капацитет за 400 возила на местото на постојниот паркинг кај стоковната куќа „Илинден“. Kамен темелникот за изградба на плоштадот беше поставен на 17 јануари 2012 година. Реализацијата на првата фаза заврши кон средината на минатата година и чинеше околу 2,7 милиона евра. Автори на Идејното решение се архитектите Бетим Зеќири, Бекир Адеми и Бесиан Мехмети.

[https://build.com.mk/vtorata-faza-od-izgradbata-na-ploshtad/]

//////////////////////////////

12.01.2015

Започна втората фаза од изградбата на плоштадот „Скендербег“

Скопската општина Чаир ги отпочна работите за изградба на втората фаза од плоштадот „Скендербег“, со која е предвидено да се премости булеварот Гоце Делчев. Работниците на градежната компанија „Бауер БГ“ веќе го оформуваат градилиштето. Од локалната самоуправа најавуваат дека јавниот простор над скопската сообраќајница ќе се протега на 8.000 метри квадратни, додека површината пред стоковната куќа „Илинден“ ќе опфаќа околу 14.000 метри квадратни. Плоштадот ќе се простира од стоковната куќа „Мост до улицата Стив Наумов, како и од стоковната куќа „Илинден“ до Македонската опера и балет.

[https://build.com.mk/zapochna-vtorata-faza-od-izgradbata-na/]

///////////////////////////////////////////////////

05.05.2017

Втората фаза од плоштадот „Скендербег“ поскапе за дополнителни 300.000 евра

Изградбата на скопскиот плоштад „Скендербег“ се ближи кон својот крај, но цената на проектот продолжува да расте. Општина Чаир и „Бауер БГ“ од Скопје на почетокот од април годинава склучиле дополнителен договор за непредвидени работи во висина од 18.174.129 денари. Вкупната вредност на проектот се искачи на над 682 милиони денари и надмина 11 милиони евра, вклучувајќи ја единствено втората фаза. Локалните власти веќе најавија дека оваа фаза од изградбата на плоштадот „Скендербег“ ќе заврши до крајот на мај годинава.

Покривањето на левиот дел од јавниот простор се одвива побрзо, поаѓајќи од фактот што се употребуваат префабрикувани бетонски елементи. На терен веќе се поставува и дел од урбаната опрема на плоштадот, кој е предвидено да се простира на 22.000 метри квадратни. Премостувањето на булеварот „Гоце Делчев“ опфаќа површина од 8.000 метри квадратни. Локалните власти порачаа мозаици, кои ќе се постават на бетонските платоа кон чаршијата и кон страничните ѕидови на скалите од амфитеатарот.

По целосното завршување на работите, општина Чаир планира да премине кон реализација на третата фаза од проектот. Овој сегмент ќе опфати изградба на подземен паркинг на две нивоа со капацитет од 400 возила, со што ќе се ублажи проблемот со недостиг за паркирање околу Старата скопска чаршија.

[https://build.com.mk/vtorata-faza-od-ploshtadot-skenderbeg-poskape-za-dopolnitelni-300-000-evra/]

///////////////////////////////////////////////////////////////////////////

29.08.2017

ФОТО ВЕСТ: Заврши втората фаза од изградбата на плоштадот „Скендербег“

Општина Чаир ја комплетираше реализацијата на втората фаза од изградбата на плоштадот „Скендербег“ во центарот на Скопје. Новиот плоштад го премостува булеварот „Гоце Делчев“, оформувајќи јавен простор со површина од околу 8.000 метри квадратни. Во средиштето на јавниот простор е поставена инсталација, чиј облик го следи дизајнот на новиот објект на Македонската филхармонија. Инсталацијата е прекриена во бела боја, градејќи незначителна врска со објектот на Македонската опера и балет.
Просторот под плоштадот е осветлен и е оспособен за движење на возила, пешаци и велосипеди, додека од страничните страни на плоштадот се изведени пристапи за велосипеди, два ескалатора и лифт. Скалишниот простор се спушта кон стоковната куќа „Мост“, Старата скопска чаршија и споменикот на Скендербег. Пред некогашната стоковна куќа „Илинден“ е поставен споменикот „Скендербег“, чијшто нов постамент е издигнат неколку метри повисоко во однос на претходниот постамент.
Пред обележјето на оваа значајна личност за албанскиот народ е оформен втор помал плоштад. Централно место во овој јавен простор заземаат мозаиците со мотиви од неколку албански тврдини, но и со мотиви од старо Скопје. Меѓу нив, сигурно најголемо внимание ќе предизвика муралниот мозаик налик на оној што го краси Националниот историски музеј во Тирана. На скопската верзија се наоѓаат знамето на Албанија, Мајка Тереза, Скендербег, албанските партизани и преродбеници, но и други ликови од албанската историја. На околниот простор е поставена урбана опрема и осветлување.
Изградбата на плоштадот „Скендербег“ чинеше над 11 милиони евра. Овој проект беше составен дел од проектот „Скопје 2014“, во кој како инвеститор се јавија македонската влада и општина Чаир. Градежните работи на терен ги изведуваше скопската фирма „Бауер БГ“. Целокупната површина на плоштадот треба да опфати 22.000 метри квадратни, но третата фаза од проектот треба допрва да се изведува.
Во последната фаза од реализацијата на плоштадот „Скендербег“ треба да се изведе подземен паркинг на две нивоа со капацитет од 400 возила. Засега нема информации за тоа кога би почнала изградбата на овој паркинг.

[https://build.com.mk/foto-vest-zavrshi-vtorata-faza-od-izgradbata-na-ploshtadot-skenderbeg/]