15/10/2014
В година ќе се градат првите куќи во Сончев град
Според инвеститорите од турската компанија „Џеваир холдинг“, кои од Владата купија 83 хектари земјиште за 1,8 милион евра, изградбата на новата населба Сончев град во Сопиште може да почне напролет в година, пишува „Дневник“.
Токму напролет се очекува да заврши изградбата на новиот пат на планината Водно, сообраќајна врска меѓу Сопиште и Скопје, најавен од Владата како предуслов за почеток на проектот.
Трасата за патот беше пробиена во јули 2013 година, а неговата намена е да ги спои јужната и северната падина на парк-шумата. Патот е практично продолжение на улицата „Тодор Александров“ (поранешна „Салвадор Алјенде“), која минува покрај поранешниот хотел „Панорама“ кон Средно Водно, каде што на вториот голем свиок се двои и продолжува кон идната населба.
Така, освен активности за изградба на патот, долг 4,5 километри, во моментов траат и градежните активности за реализација на фекалната канализација за населбата. Во август годинава беше избран изведувач, фирмата „Жикол“ од Струмица, а за водоводот изведувачот допрва ќе се бара. Фекалната канализација, чиј рок за завршување е крајот на 2015 година, и водоводот се инвестиции на Министерството за транспорт и врски. Двата проекта ќе чинат 9,5 милиони евра, пари што ќе се издвојуваат во три фискални години. Патот чини 6,7 милиони евра, исто така буџетски средства, а го изведува Агенцијата за патишта.
Во рамките на новата населба Сончев град, предвидено е отпрвин да се изградат најмалку 75 куќи, со кои ќе се запази договорот за исполнување 10 отсто од целиот проект. Општината Сопиште во мај годинава издаде градежни дозволи за овие куќи. Од нив повеќето се луксузни, а ќе има и неколку колективни објекти, трговски центар, образовни дејности, бензински пумпи, објекти за рекреација. Сите ќе се градат по принципот клуч на рака.
Во Сончев град е предвидено да се изградат околу 600 куќи за речиси 6.000 жители.
[https://www.porta3.mk/v-godina-kje-se-gradat-prvite-kukji-vo-sonchev-grad/]
///////////////////////////////////////
20 октомври 2016
СОНЧЕВИОТ ГРАД ИЗЕДЕ 9,5 МИЛИОНИ ЕВРА ДРЖАВНИ ПАРИ, А НИКАКО ДА ВИДИ СОНЦЕ
Сончевиот град на периферијата на главниот град во атарот на селото Сопиште никако да види сонце. Неговата изградба почнува секој веќе токму 10 години, но место луксузна населба од која требаше да се офајдат и мештаните, во Сопиште зјаат голи ридови.
Јужната страна на Водно, резервирана за Сончевиот град е прекриена со грмушки, дрвја и карпи. Од идната населба видлив е само патот. Тој го пресекува Водно и се спушта во Сопиште, за жителите на новата населба да не кружат преку Кисела Вода. Патот во најголем дел е веќе изграден. Сега се уредува спојот со главната улица во Сопиште. Се прави голема крстосница со кружен тек на која работат двесеттина градежници. Едни поставуваат рабници, други ги бетонираат, трети поставуваат тампон…
Мештаните кои ја следат нивната работа се прашуваат зошто државата не направи таков пат и низ селото.
„И нам ни треба ваква широка улица, не само на оние што ќе дојдат тука да живеат“, вели продавачка во локалното дуќанче лута што државата на сиромашните им прави тесни улици и не ги поправа кога ќе се уништат.
Поделбата на богати и сиромашни во Сопиште е многу израена.
„Ако ги барате богатите свртете десно, се друго е сиромаштија. Од десно ќе се прави и новиот град, ете тука над новата раскрсница“, велат мештаните.
Таково објаснување и не е неопходно. Луксузните градби на едната страна зборуваат сами. Околу нив е празно, за разлика од другиот дел на Сопиште каде што жителите во речиси секој двор се подготвуваат за зима. Редат дрва за огрев, прават зимници, чадат оџаците од секоја куќа…
Новите комшии ќе ги добијат по неколку години. Турската компанија „Џеваир холдинг“, последен сопственик на земјиштето за Сончев град, за да почне да ја гради елитната населба, чека да се заврши изградбата на инфраструктурата. Патот, кој чини 6,7 милиони евра е во завршна фаза, а водоводот, според најавите, ќе биде изграден до крајот на следната година.
Водоводот и канализацијата заедно ја чинат државата 9,5 милиони евра. Компанијата го купи земјиштето за 1,7 милиони евра од државата и се обврза да ја изгради елитната населба во која ќе има околу 600 куќи, училиште, градинка, спортски терени, зелен појас и трговски центри. Во рок од шест години, треба да бидат изградени барем 10 отсто од содржините.
Турците се трето решение за изградба на Сончев град. Пред нив земјиштето од државата го купија Изралеци, односно компанијата „Индустриал билдинг корпорејшн“ за 3,6 милиони евра во 2007 година. Тие се обврзаа да го изградат Сончев град до 2011 година, но се откажаа оти утврдија дека парцелата понудена на тендерот е различна од онаа на терен, поднесоа и тужба против државата која во 2011 година спогодбено ја повлекоа и официјало се откажаа од проектот.
Одлуката, пак, да се гради Сончев град е донесена уште во 2006 година. Тогашниот министер за транспорт и врски Џемали Мехази, со заклучок на Влада, требаше со непосредна спогодба да го продаде земјиштето на германската Бихард Констракшн Интернешнал, заинтересирна да ја изгради елитната населба. Непосредната спогодба ја спречи тогаш Антикорупциската комисија која го предупреди министерот дека пред избори не смее да отуѓува државен имот, а по изборите Германците се предомисија. Се повлекоа оти утврдија дека има нерасчистени имотно-правни односи. Тие открија дека дел од земјиштето за Сончев град државата го дала на користење на винаријата Сковин, а поради продажбата на земјиштето и го одзела корисничкото право, на што винаријата се жалеше.
Земјиштетото на Израелците им го продаде Миле Јанакиески во првиот мандат како министер.
[https://sdk.mk/index.php/neraskazhani-prikazni/soncheviot-grad-izede-9-5-milioni-evra-drzhavni-pari-a-nikako-da-vidi-sontse/]
/////////////////////////////
28 Февруари, 2019
„Сончев град“ ќе почне да се гради дури следната година
Есер Џевахир, инвеститорот на „Сончев град“ изјави дека елитната населба на Водно ќе започне да се гради следната година.
- Она што досега е извршено е еден милион метри кубни ископ. Можам да кажам дека се направени првичните подговотвки на земјиштето на кое што се наоѓаме за започнување со работа и изградени се патиштата за движење во парцелата. Планираме да започнеме во првата половина на 2020 година - истакна инвеститорот на прашањето на „24 Инфо“ до каде е проектот кој треба да се реализира крај Сопиште, а за расчистување на теренот беше исечена огромна површина на шума.
Долгонајавуваниот елитен комплекс Сончев град, прво ќе добие една станбена зграда и 75 луксузни куќи кои според проектот ќе имаат наjмалку три ката. Во тек се подготвителни работи околу стартот на градежните активности, се пробиваат мали споредни улици во населбата, а регионалниот пат во должина од 4,5 километри за поврзување на Скопје со Сончев град, треба да се заврши следната година. Министерството за транспорт и врски веќе распиша тендер за изградба на канализација.
Инвеститор на елитната населба е турската компанија „Џевахир холдинг”, која ги гради и висококатниците во населбата Аеродром. Сончев град ќе опфаќа површина од 85 хектари, а „Џевахир холдинг” има обврска на 51 отсто од парцелата за населбата да изгради куќи.
[https://faktor.mk/sonchev-grad-kje-pochne-da-se-gradi-duri-slednata-godina]
