12 ноември 2019
ОБВИНИТЕЛСТВОТО 4 ГОДИНИ МОЛЧИ, ОД УТРЕ МОЖЕ ДА СЕ ГРАДИ БАРОКНАТА КАТНА ГАРАЖА ОД ПРОЕКТОТ „СКОПЈЕ 2014“ КАЈ „АВТО МАКЕДОНИЈА“
Фирмата „Никофон“ од утре може да почне да ја гради барокната катна гаража на 8 ката кај „Авто Македонија“ во центарот на Скопје, која беше предвидена како дел од проектот на Владата на Никола Груевски „Скопје 2014“.
Со извршно решение, „Никофон“ утре го презема во владение просторот кој сега се користи како паркинг ЈП „Паркинзи Општина Центар“ и може да почне постапка за градење, бидејќи дозволата за градба му е издадена во 2014 година.
За овој случај, уште во 2015година е поднесена кривична пријава за начинот на кој е формирана цената по која е продадено земјиштето, а годинава Општина Центар поднесува пријава и за злоупотреба на службена дејност за начинот на продажба на парцелата. Но, Обвинителството досега нема отворено истрага, што остава можност од утре да се почне постапка за оградување на просторот и градење.
Овој простор е единствената слободна површина која беше спасена од мегаломанскиот проект „Скопје 2014“. Парцелата беше продадена од Министерството за транспорт и врски кога министер беше Миле Јанакиески во 2013 година, а договорот со „Никофон“ беше склучен во септември 2013.
Претходно, Општина Центар во времето кога градоначалник беше Владимир Тодоровиќ со измена на Деталниот урбанистички план за овој дел, нацрта маркичка за барокна катна гаража со деловен простор, со приземје и 8 ката. Градежната дозвола „Никофон“ ја доби на 31 март 2014 година, а стана правосилна на 16 јуни 2014. Но бидејќи тој простор е државно земјиште, неколку години пред да биде вцртана маркичка за катна гаража, бил даден во владение на ЈП „Паркинзи Општина Центар“ заради формирање организирано паркирање. Со цел да се спречи изградба на зградата, „Паркинзи Центар“ не го отстапува просторот повикувајќи се на одлуката за владение, по што инвеститорот поднел тужба и почнал судскиот процес. „Никофон“ добива судска пресуда дека тој е сопственик на парцелата и утре со извршно решение ќе го преземе паркингот.
Градоначалникот на Општина Центар Саша Богдановиќ за САКАМДАКАЖАМ.МК потврди дека од утре на паркингот веќе може да почне градбата на барокната гаража против која граѓаните организираа протести, а за тоа го обвинува Обвинителството оти не отворило постапки по кривичните пријави уште од 2015 година.
„Добивме известување дека утре со извршно решение ќе се преземе просторот. Со тоа може да почне со постапката за градење на катната гаража. Доколку Обвинителството отвореше постапка за овој случај, за кој е поднесена кривична пријава уште во 2015 година, можеше да се донесе времена мерка за стопирање на сите активности и немаше да се доведеме во оваа ситуација. А, со утврдување на вина по кривичната пријава, ние ќе можевме да го раскинеме договорот. Кривичната пријава е поднесена за начинот на кој е формирана почетната цена на јавното наддавање, која била спуштена на 1.800 денари, со што е оштетен буџетот. Ние дополнително како Општина поднесовме докази и материјали за злоупотреба на службена должност и поради начинот на кој се менувал Правилникот за градба со цел да се овозможи градба на ваков објект во тој дел“, вели за САКАМДАКАЖАМ.МК градоначалникот Богдановиќ.
За просторот кај „Авто Македонија“ граѓаните организираа протести, не му дозволуваа на сопственикот да го загради просторот и бараа од тогашниот нов градоначалник Андреј Жерновски кој ја презема функцијата од Владимир Тодоровиќ, да не дозволи градење.
[https://sdk.mk/index.php/sakam-zeleno/obvinitelstvoto-4-godini-molchi-od-utre-mozhe-da-se-gradi-baroknata-katna-garazha-od-proektot-skopje-2014-kaj-avto-makedonija/]
////////////////////////////////////////////////////////////
14 ноември 2019
ОПШТИНА ЦЕНТАР НЕ ДОСТАВИ ДОКАЗИ ДЕКА Е СТОРЕНО КРИВИЧНО ДЕЛО ЗА БАРОКНАТА КАТНА ГАРАЖА КАЈ „АВТО МАКЕДОНИЈА“, ВЕЛАТ ОД ОБВИНИТЕЛСТВОТО
Не постоеле докази за кривичните пријави во 2015 година, а Општина Центар не доставила ни дополнителна документација за случајот со продажбата на државното земјиште“, велат од Јавното обвинителството за случајот за изградба на катната гаража кај „Авто Македонија“.
Од Обвинителството велат дека јавниот обвинител, согласно Законот за кривична постапка, презедел голем број дејствија за да се направат неопходните проверки врз основа на релевантни писмени и вербални докази. Предметот сѐ уште е во фаза на предистражна постапка и не е донесена јавнообвинителска одлука.
„До Основното јавно обвинителство Скопје, од страна на двајца подносители – физички лица, во март 2015 година беше поднесена кривична пријава против четири лица, а во септември 2016 година беше поднесено и проширување на пријавата против уште едно лице за кривично дело – Злоупотреба на службената положба и овластување. Наведените кривични пријави се однесуваат на евентуални неправилности во поглед на неисполнување на договорните обврски од склучен договор меѓу Министерството за транспорт и врски како оттуѓувач на градежно земјиште во државна сопственост со фирмата ‘Никофон’, по пат на електронско јавно наддавање. Кривичната пријава беше поднесена без да биде приложен ниту еден доказ за да бидат поткрепени наводите“, се вели во одговорот на Обвинителството откако градоначалникот на Општина Центар Саша Богдановиќ ги повика да постапат по кривичните пријави и да донесат времена мерка за било каква активности на парцелата.
Надлежниот јавен обвинител во текот на истражната постапка на записник го задолжил претставникот на Општина Центар да достави документација за поткрепа на главниот навод во пријавата – дали се преземени мерки по истекот на договорниот рок од издавањето на одобрението за градба. Претставникот на Општината доставил делумно појаснување и презел обврска да го извести Обвинителството откако конечно ќе заврши постапката по одобрението за градба која тогаш била во тек. Но, такво известување од Општина до овој момент не е доставено до Обвинителството.
„Во септември годинава Обвинителството, на нивно барање, прими двајца претставници на Општина Центар и ги запозна со текот на предметот и со преземените и неисполнети обврски на испитаниот претставник на општината. Во разговорот со нив, предмет на интерес на јавниот обвинител беше дали општината ги презела правните механизми кои и стојат на располагање пред надлежните судови доколку сметале дека не се испочитувани договорните обврски и дали за тоа го известиле Државното правобранителство. Претставниците на општината наведоа дека такви сознанија немаат во моментот, а дополнително до Обвинителството доставија единствено Правилник за определување на цената на градежното земјиште. Со ова тие не постапија по повторното задолжување од страна на јавниот обвинител да ја достават релевантната документација за текот на мерките и дејствијата што ги презела општината во рамките на својата надлежност за заштита на интересот на граѓаните“, велат од Обвинителството.
[https://sdk.mk/index.php/dopisna-mrezha/opshtina-tsentar-ne-dostavi-dokazi-deka-e-storeno-krivichno-delo-za-baroknata-katna-garazha-kaj-avto-makedonija-velat-od-obvinitelstvoto/]
///////////////////////////////////////////////////////////////////////
14 ноември 2019
ГО КУПИВ ЗЕМЈИШТЕТО ОТИ ЛОКАЦИЈАТА Е АТРАКТИВНА, ВЕЛИ СОПСТВЕНИКОТ НА „НИКОФОН“ ЗА БАРOКНAТА КАТНАТА ГАРАЖА КАЈ „АВТО МАКЕДОНИЈА“
Фирмата „Никофон“ наскоро ќе почне со активности за градење на катната гаража кај „Авто Македонија“ бидејќи до сега не нашле заедничко решение со Општина Центар. Сопственикот Никола Настески за САКАМДАКАЖАМ.МК и вели дека имале неуспешни преговори за Општина Центар, но и понатаму остануваат отворени за разговори.
„Ќе продолжиме со изградба на катната гаража, со оглед на тоа дека преговорите со Општината за изнаоѓање на алтернативно решение завршија неуспешно. Станува збор за инвестиција од приближно 5 милиони евра. Сепак живееме во општество каде сопственоста е загарантирана со Устав и со закон“, вели Настески.
И покрај реакциите на граѓаните и стручната јавност дека оваа локација не е соодветна за изградба на барокна катна гаража од осум ката, за Настаски оваа парцела е атрактивна.
„Се одлучивме за наведената локација заради нејзината атрактивност и бизнис оправданост. Во однос на обвинувањата дека за купопродажбата на земјиштето се поднесени кривични пријави, мене тоа не ми е познато, ниту сме учествувале во било какви активности. Земјиштето е уредно купено во постапка на јавно наддавање“, вели Настески.
На прашање на САКАМДАКАЖАМ.МК дали поради јавниот интерес би се одлучиле да го раскинат договорот, со што би им биле вратени парите кои ги платиле за купување на земјиштето Настески вели тоа не зависи само од нив, туку и од Општина Центар но ‘сите опции се отворени’.
„Никофон“ го купи државното земјиште, кое сега е паркинг, на јавно наддавање кое се одржа на 7 јуни 2012 година. Почетната цена на јавното наддавање беше 1.850 денари за метар квадратен, а на наддавањето „Никофон“ понуди највисока цена од 6.150 денари и за парцелата од 1.245 метри квадратни плати 7.6 милиони денари.
Општина Центар и граѓаните токму за начинот на формирање на цената имаат поднесено кривични пријави. Во кривичните пријави се спори почетната цена бидејќи според Правилникот за утврдување на висината на цената на градежно земјиште при компатибилна намена таа треба да е 70 отсто од цената за изградба на катна гаража која е 6.000 денари и 30 отсто од цената за деловен простор која е 5.000 денари.
Градоначалникот на Општина Центар Саша Богдановиќ вчера го повика Обвинителството да постапи по кривичните пријави и да донесе времена мерка за било какви активности.
Од Обвинителството уште не одговорија на прашањата зошто уште не постапуваат по кривичните пријави поднесени за продажбата на градежното земјиште.
[https://sdk.mk/index.php/dopisna-mrezha/go-kupiv-zemjishteto-oti-lokatsijata-e-atraktivna-veli-sopstvenikot-na-nikofon-za-baroknata-katnata-garazha-kaj-avto-makedonija/]
///////////////////////////////////////////////////////
23/04/2021
Судски ќе се раскинува договорот за изградба на катна гаража кај „АвтоМакедонија“
На 5 јули годинава во Основниот граѓански суд Скопје ќе се одржи подготвително рочиште за раскинување на договор поврзан со купопродажба на државно градежно земјиште со јавно наддавање.
Договорот кој ќе биде предмет на раскинувањето се однесува на просторот кај паркингот до „АвтоМакедонија“, во Градскиот Ѕид.
Земјиштето било оттуѓено примарно од страна на Министерството за транспорт и врски во 2012-та година, за што бил склучен и Договор помеѓу Министерството и НИКОФОН Дооел, соопштија од Општина Центар.
Со Одлука на Владата на Република Северна Македонија од декември 2018-та година, овој договор беше предаден на надлежност на Општина Центар-Скопје.
Одговарајќи на прашањата во вчерашното гостување на Само Вистина на Канал 5, но и на гостувањето на Топ Тема на ТВ Телма, градоначалникот на Општина Центар, Саша Богдановиќ, информираше дека самиот сопственик на земјиштето поднел барање за раскин на договорот и дека предметот во моментов се наоѓа во суд.
Од причини што реализацијата на договорот со тек на време стана неизвесна и невозможна, преземени се чекори за раскинување на договорот.
[https://nezavisen.mk/sudski-kje-se-raskinuva-dogovorot-za-izgradba-na-katna-garazha-kaj-avtomakedonija/]